படம்: கைதட்டி சுனை
வெள்ளிங்கிரி வெள்ளியங்கிரி தல வரலாறு
பொது தகவல்: சிவபெருமான் குடிகொண்டிருக்கும் கைலாயம் மூன்று. வடகைலை என்பது வட துருவத்தில் கடலில் அமைந்துள்ளது. மத்திய கைலை என்பது இமயமலையில் உளளது. தென் கைலை என்பது தமிழகத்தில் கோவை நகரிலிருந்து சுமார் 30 கி. மீ. தொலைவிலுள்ள வெள்ளிங்கிரி, வெள்ளிமலை, தென்கைலாயம் என அழைக்கப்படும் வெள்ளியங்கிரியில் அமைந்துள்ளது. இதில் வட கைலைக்கு செல்லவே முடியாது என்பர். மத்திய கைலை அனைத்து மக்களும் சென்று தரிசனம் செய்வது என்பது சிரமமானது. இந்த குறையை போக்கும் வகையில்தான் வெள்ளியங்கிரி கோயில் அமைந்துள்ளது. இங்கு சென்று ஈசனை தரிசித்தால் இமயமலையில் உள்ள கைலாயத்தை தரிசித்த பலன் கிடைக்கிறது. ஒரு முறை வெள்ளியங்கிரி மலை ஏறிவந்தால் ஆண்டு முழுவதும் உடற்பயிற்சி செய்த பலன் கிடைக்கிறது. மலை முழுவதும் மூலிகைகள் இருப்பதால் உடலுக்கும் உள்ளத்துக்கும் நன்மை கிடைக்கிறது. தமிழ், தெலுங்கு வருடப்பிறப்பு, சித்ரா பவுர்ணமி, கார்த்திகை ஆகிய நாட்களில் மலைமீது உள்ள சுவாமிகிரியை தரிசிக்க ஆயிரக்கணக்கான பக்தர்கள் செல்கிறார்கள். ஆனால் மலை அடிவாரத்தில் உள்ள வெள்ளியங்கிரி ஆண்டவரை ஆண்டு முழுவதும், அனைவரும் சென்று தரிசிக்கலாம்.
தலபெருமை: இத்தலத்தில் ஒருவருக்கு அன்னதானம் செய்தால் காசியில் ஆயிரம் பேருக்கு அன்னதானம் செய்த பலன் கிடைக்கும். இந்த மலைக்கும், ராமாயண, மகாபாரத சம்பவங்களுக்கும் நிறைய தொடர்பு உள்ளது என்பர். இங்கு ஏழு மலைகள் உண்டு. இதில் ஐந்தாவது மலையில்தான் சீதை தவமிருந்து சிவனிடம் வரம்பெற்றதாக கூறப்படுகிறது. அதேபோல் அர்ச்சுணன் பாசுபதம் பெற வேண்டி இறைவனை நோக்கி தவம் இருக்கும்போது இறைவன் வேடன் உருவில் வந்து, அர்ச்சுணனுடன் சண்டையிட்டு முடிவில் பாசுபதம் வழங்கிய தலம் வெள்ளியங்கிரி என புராணங்கள் கூறுகின்றனர். இத்தலம் மேற்கு தொடர்ச்சி மலையில் 6,000 அடி உயரம்கொண்டதாக அமைந்துள்ளது. கோவைக்கு குடிநீர் வங்கும் சிறுவாணி அமையும், நொய்யல் ஆற்றின் பிறப்பிடமும் இங்குதான் உள்ளது. இங்கு முதல் மலையிலிருந்து ஏழாவது மலை வரை 5.5 கி.மீ. தூரமும் அடர்ந்த காடாக இருக்கிறது. எனவே பங்குனி, சித்திரை மாதங்களில்தான் பக்தர்கள் அதிகமாக வந்து செல்கிறார்கள். இம்மலையில் அடிவாரம் முதல் ஆண்டி சுனை வரை அமைந்துள்ள ஆறு மலைகளும் மனித உடலில் உள்ள மூலாதாரம், சுவாதிஷ்டானம், மணிபூரகம், அநாகதம், விசுத்தி, ஆக்கினை என்ற ஆறு ஆதாரங்களை குறிப்பிடுவதாக அமைந்துள்ளது. இந்த ஆறு மலைகளையும் கடந்து ஏழாவது மலையான சிவன் இருக்கும் மலையே "ஞானியர் காண்கின்ற சிவஜோதி நடன மலை' என கூறப்படுகிறது. உள்ளம், உடல் உறுதி உள்ளவர்கள் மடம்டுமே இந்த புனித பயணத்தை மேற்கொள்ள முடியும். முதல் மலை அடிவாரத்தில் வெள்ளியங்கிரி ஆண்டவர் கோயில் உள்ளது. இங்கு ஆண்டு முழுவதும் பூஜைகள் சிறப்பாக நடக்கும். மலை ஏற முடியாதவர்களும் 14 முதல் 50 வயது வரை உள்ள பெண்களும் மலை அடிவாரத்தில் உள்ள கோயிலை தரிசித்து செல்கின்றனர். மலை ஏற ஆரம்பிக்கும் போது அடிவாரத்தில் கோவில் நிர்வாகத்தாரால் ஒரு மூங்கில் தடி வழங்கப்படுகிறது அதை நாம் பணம் கொடுத்து பெற்றுக்கொள்ளவேண்டும் மூங்கில் தடி இல்லாமல் கண்டிப்பாக மலை ஏற முடியாது .( மலையை விட்டு இறங்கி நாம் நமது வீட்டுக்கு மூங்கில் தடியை கொண்டு சென்று அதை பூஜை அறை ல் வைத்து இறை ரூபமாக வழிபடலாம் ).இந்த தடிக்கும் ஒரு புராணகதை உண்டு.
இம்மலையில் முதல் மலையும், ஏழாவது மலையும்தான் ஏறுவதற்கு மிகவும் சிரமமாக இருக்கும். இரண்டாவது மலை ஏறினால் கைதட்டி சுனை உள்ளது.
படம்: அடிவாரம் கோவில்
மூன்றாவது மலை ஏறி இறங்கினால் தாகம் தீர்க்க பாம்பாட்டி சுனை உள்ளது. நான்காவது மலை தாண்டி ஐந்தாவது மலையை அடைந்தால் அங்குள்ள மண் திருநீறாய் இருக்கிறது. பக்தர்கள் தங்களுக்கு தேவையான திருநீறு பிரசாதத்தை இங்கிருந்துதான் எடுக்கிறார்கள். அதனால் இம்மலை "திருநீறு மலை' என அழைக்கப்படுகிறது. இதை தாண்டி ஆறாவதுமலை சென்றால் தென் கைலாயத்தின் மானசரோவரான ஆண்டி சுனை உள்ளது. ஆண்டி சுனை எந்த காலத்திலும் பனிக்கட்டியை போட்டு நிறப்பியதுபோல் உடல் விறைத்து போகுமளவுக்கு ஜில் என்றிருக்கும். இந்த சுனையில் நீராடிவிட்டுத்தான் ஏழாவது மலையில் உள்ள ஆண்டவனை தரிசிக்க செல்லவேண்டும்.
ஏழாவது மலையான சுவாமிகிரி பார்க்கும்போது எளிதாக தோன்றும். ஆனால் அருகில் சென்றால் மலை மிகவும் செங்குத்தாக இருக்கும். இந்த மலையில் இயற்கையாகவே துவார பாலகர்கள் போன்ற இரு பாறைகள் சன்னதியின் முன்பு அமைந்துள்ளது.
இங்கு ஆறடி அகலமுள்ள சிறிய குகையில் சிவன் பஞ்ச லிங்கங்களாக, சுயம்பு மூர்த்தியாக அருள்பாலிக்கிறார். இப்போதும் இங்கு பல சித்தர்கள் நமது கண்களுக்கு தெரியாமல் இருப்பதாக கூறப்படுகிறது.
